Speaker-in TNAI inkhawmpui a hmanpui

Trained Nurses Association of India (TNAI), Mizoram State Branch chuan nimin khan Synod Hospital College of Nursing auditorium-ah Biennial Conference vawi 21-na an hmang a, Assembly speaker Lalbiakzama'n a hmanpui.

Lalbiakzama chuan, nurse-te chu ram leh khawtlang tana hna pawimawh, tihdam rawngbawl hna thawktu an nih thu a sawi a, "Natna khirhkhàn tak tawrh châng pawhin nurse-te hi mipuite'n kan thlamuanpui ber an ni," a ti a; nurse-te ṭawngkam khat lek pawh damlote tan damna tling a nih avangin duat taka damlote enkawl zel turin nurse-te a ngen.

Nurse-te hi ram danga hna thawh kawngah Mizoram tana sûlsutu an ni tih sawiin Speaker chuan, "Ram danga hna thawka kalte hian kan ram leh chhungkaw sum leh pai dinhmun chawi sang thei khawpin hlawh pawh an nei ṭha a, Mizoram tihmingṭhaa tihmingchhe theitu an nih avangain fimkhur lehzuala nun an hman a pawimawh," a ti.

Assembly Speaker hian Zoram Medical College & Hospital nursing staff-te buatsaih ‘Doral Hlimthla Covid-19 Pandemic Experiences’ tih lehkhabu a tlangzarh.

TNAI, Mizoram State Branch Biennial Conference-ah hian Speaker hian Florence Nightingale Award dawngtu V Lalhmangaihi, TNAI member zinga doctorate degree nei Dr C Lalramdini leh Dr Lalṭanpuii te bakah, TNAI member kum 80 chung lam conference chhimtute hnenah chawimawina a hlan a ni.

Chawhnu lamah TNAI member thite sûnna hun hman a ni a, mithiamte paper buatsaih zirho a nih bakah, rorel inkhawm neih a ni bawk.