KHAWTHLIR

CM nen inkâwm

Chief minister Lalduhoma chu nimin khan a pisaah India Accelerator hotute'n an kâwm a, Mizorama hma an lak theih dan tura an ruahmante an hrilh. India Accelerator hian eizawnna lama hmalakna chi hrang hrangah mite a ṭanpui ṭhin a, sum leh pai thlengin a ngaihtuah thei. An hmalak theihna a tam avangin Mizorama kut an thlak theihna department hrang hrang enkawltu secretary-te nen an ṭhukhawm tawh a, a taka kalpui theih chite chu bawhzui ni se,' an ti a ni.

CPR tih dan zirtir

Serchhipa awm Assam Rifles chuan CPR Awareness Week pualin nimin khan Serchhip College-ah CPR chungchang inzirtirna leh a taka entirna an buatsaih. College zirlai 150 vel an tel a; mihring nikhaw hre loa awm tawh thawk pek dan a takin an zirtir a ni.

Swaachata Hi Seva Campaign buatsaih

Ministry of information and Broadcasting hnuaia Aizawla Central Bureau of Communication (CBC) Field Office chuan nimin khan Zotlang High School-ah zirlaite pualin faina chungchang inzirtirna, Swaachata Hi Seva Campaign an buatsaih. CBC in-charge Lalginlen Lhouvum-in campaign hawnna thu a sawi a, khuallian Dr Isarala, Zotlang High School headmaster-in thu sawiin, faina leh thianghlimna nunpui tlat turin zirlaite a chah. Zotlang H/S leh a chhehvel tihfai hnatlang neih nghal a ni.

EVM thliar

Dampa assembly constutuency by-election atan inpuahchahna a kal mek a, October 15, Nilaini khan district election officer K Laltlawmlova, bawrhsap hoin EVM leh VVPAT chinfel thawh khatna (first randomisation) neih a ni. Dampa bial chhung polling station 41-a hman tur EVM leh VVPAT thliar a ni a, EVM leh VVPAT 82 thliar hran a ni. Randomisation-ah hian by-election returning officer Malsawmzuala, Election official dangte bakah, political party aiawhte an tel.