FCAA 2023 vangin Candle Light Vigil huaihawt dawn

Joint Civil Society of Mizoram (JCM) hruaitute chuan nimin khan Aizawl Press Club-ah thuthar thehdarhtute an kâwm a; Mizoram sorkarin Forest (Conservation) Amendment Act, 2023 a pawm tawh sût tura sorkar ngen nan leh Article 371G chawi nunna atan zaninah Candle Light Vigil an huaihawt dawn thu an puang.

JCM co-convener Lalram­mawia chuan, Mizoram sorkarin a nih ang anga FCAA 2023 a pawm chu a him lo niin a sawi a, "Sût leh ngei tura roreltute kan lo ngen tawhnaah khan kan la ding reng. Ram rorelna in sangah sût leh a nih theih nan hmalak zel kan tum a, mipui ṭawiawmna kan ngen " a ti.

Lalrammawia chuan, "FCAA 2023 hi dan ṭihbaiawm tak a nih avanga kan duh lohna te, ram roreltute chu an thu lo rel tawh ennawna sût leh ngei tura kan ngenhona leh Article 371G chawinunna atan October 17, 2025 zanah hian, a huho emaw, chhungkua ang pawha Candle Light Vigil nei turin kan ngen a ni," a ti a; Candle Light Vigil mahni remchan dan anga hun hmang turin mipui an ngen tih a sawi a ni.

JCM Co-convener chuan, Mizoram châk lâkna kawngpuiin ngaihthah a hlawh tih sawiin, "Kan ram hruaitute hian kawngpui sial/siam thar mek leh siam thar tur ruahmanna an neihte thlengin kan ram hmakhua tithim zawngin ke an pên zel niin kan hria a, kan rilru an tina khawp mai. FCAA 2023 hman an duhthawhna te, environment an palzûtnate hi mipui mimir hian kan enghelh tâwk loh vang pawh a ni pakhatah kan ngai," a ti.

Lalrammawia chuan, "Sorkar hotute hmalakna sawhkhâwk awm hun tur kan suangtuah thiam lo a nih pawhin, party emaw, mimal leh pawl emaw ruihchilh hauh loa thu tak zir chhuak thei tura mipuite'n ngaihtuahna kan siam thar kan duh a, kan ngen nghal a ni," a ti bawk.