Kawng chhiat vangin Mamit kawng NGO leh lirthei neitute'n an dang

Mamit All NGO leh Commercial Vehicle Owner Association, Mamit district ṭang dun chuan Mamit district chhung inkalpawhna kawng a chhiat lutuk avangin nimin zing dar 7 aṭang khan Mamit Zero Point-ah kawng an dang.

Pawl hrang hrangin kawng dan an tum chungchangah hian October 15, Nilaini khan PWD engineer-in-chief H Zoramliana chu Mamitah a kal a; zanah Mamit bawrhsap K Laltlawmlova kaihhruaiin DC conference hall-ah Mamit NGO leh lirthei neitute nen an inkâwm.

NGO leh lirthei neitu pawl hruaitute chuan Mamit khawpui leh district chhung khaw dangte'n harsatna an neih an sawi a, "Tun dinhmunah Mamitah petrol leh diesel a awm lo. Dam lohna vanga hmunpui zawk pan ngaite tan harsatna nasa tak a thleng a ni," an ti.

PWD E-in-C chuan, highway-ah PWD an inrawlh vak loh thu sawiin, "Chutih rualin, mipuiin harsatna nasa tak an tâwk a, kawngpui hial dan tum a nih tak avangin a pawimawh," a ti a, hma an lak tur thu a sawi.

Kawng enkawlna atan cheng vbc 11 an hmuh thu sawiin PWD E-in-C chuan, "Kawng hlui enkawlna tur pawisa hmuh a ni a, hmalak nghal tum a ni. NH-44A siamna tur cheng vbc 170 pawh sanction tawh a ni. Central sokarah hna rang taka a kal theih nan nawr mek a ni," a ti.

H Zoramliana chuan, mipui tana harsatna siam lo zawnga anmahni lo ngaichang tur leh harsatna hrethiam turin NGO leh lirthei neitute a ngen a, "CE, SE leh EE te kar tin tlawh turin ka hrilh," a ti a, chak zawka hna an thawh tur thu a sawi.

DC leh PWD E-in-C hoa an ṭhutkhawm zawh hian Mamit NGO leh Commercial Vehicle Owners Association hruaitute chu an ṭhukhawm leh a, kawng dan an tum chu kaltlangpui turin thutlukna an siam.

Nimin zing dar 7 aṭangin an ruahman angin kawng an dang ṭan a, dam lohna thila pawimawh bik tih loh chu lirthei zawng zawng an dang a, lirthei eng emaw zat a tangkhang. He thu ziah lai thleng chuan kawng dan a la ni a, Mamit DC chu kawng danna hmunah a kal.

Thu dawn danin, Mamit panna kawngpui hi siam ve reng ni mah se, hna thawktu leh khawl a awm mumal ngai lo. Niminah chuan lung tam zawkte lak khawm a ni a, thawktu pawh tam zawk dah a ni.