Kawng chhiat vangin kawng dang dawn

All NGO's Mamit leh Commercial Vehicle Association, Mamit chuan Aizawl - Mamit - Bairabi kawng leh Mamit-Zawlnuam kawng chu lirthei tan kal hleih theih loh khawpa a chhiat vangin naktuk aṭangin tiam chin awm loin an dang dawn.

Mamit NGO leh Commercial Vehicle Association chuan, Mamit district tana châk lakna leh veivahna kawngpui pawimawh, Mamit-Aizawl, Mamit-Bairabi leh Mamit-Zawlnuam te chu lirthei chi tin tan kal hleih theih loh khawpin a chhia niin an tarlang a, "Chhuanlam hotê tê siam tawh lo a, a rang thei ang bera siam ṭhat a nih theih nan hma la turin October 3, 2025 khan thuchhuah siamin Mizoram sorkar kan ngen tawh," an ti.

October 4-12, 2025 chhung sorkar hmalakna an ngaihchan thu tarlangin Mamit NGO leh Commercial Vehicle Association chuan, "Sorkar hmalak dante a hmun ngeiah kalin enfiah a ni. Sorkarah beiseina sang tak neia kan thlir mek laiin, hmalakna mumal leh beisei anga hnathawh a awm lo tih hmuh a ni," an ti a; sorkarin hma a lak loh avangin an hmalak zel dan tur October 13 khan an ngaihtuah tih an tarlang.

Mamit NGO leh Commercial Vehicle Association tarlan danin, an kawngpuite siamṭha tura sorkarin a taka hma a lak hma loh chuan naktuk Ningani aṭangin Mamit-Aizawl, Mamit-Bairabi leh Mamit-Zawlnuam te chu lirthei kal theih loh turin tiam chin awm loin an dang dawn a ni.

Kawngpui danga hmalak a ngai chu a pawi an tih thu tarlangin kawng dan tumtute chuan, kawng hrang hranga harsatna thleng thei lakah mipui hriatthiamna leh thlawpna an ngen.