Lengpui Airport licence tawp vangin harsatna a awm, tihnun a ni leh tawh

Directorate General of Civil Aviation (DGCA) aṭanga Lengpui Airport-in licence a neih chu October 13, 2025 khan a tawp avangin nimin khan Lengpui Airport-a thlawhna lut leh chhuak turah harsatna a awm a; nimin vek khan chinfel niin, chawhnu lamah thlawhtheihnate an thlawk leh nghal.

Thu dawn danin, DGCA aṭanga Lengpui Airport-in licence a neih mek chu October 13, Thawhṭanni khan a tawp a, chuvang chuan nimin aṭang khan Lengpui Airport chu DGCA pawmpui loh airport niin, thlawhna ṭum turte tihtawp a ni.

Mizoram sorkara Aviation-in September 16, 2025 khan DGCA-ah licence/permit tihnun (renew) dilna an thehlut tawh a, mahse, DGCA lamin an renew mai lo a, September 26 khan an thawn nawn leh bawk. Nimin chawhnu dar 1 vel khan Lengpui Airport renewal chu tihfel a ni.

Airport licence a tàwp hman avang hian nimin khan Lengpui Airport panin thlawhna an thlawk thei lo a, tihklawhtlai leh ṭhulh a ni hlawm. Licence tihnun a nih veleh nimin chawhnu lam khan Delhi, Kolkata leh Guwahati aṭangin thlawhtheihnate'n Lengpui Airport an pan thei ta a ni.