Operation Jericho vangin ruihhlo rawn lut a tlem phah - Excise Dept

Excise & Narcotics department (END) chuan thuchhuah siamin, 'Operation Jericho' tih hming vuaha ruihhlo do beihpui thlak mek thu leh, he hmalakna avang hian Myanmar aṭanga ruihhlo rawn lut hun dang aiin a tlem thu an tarlang.

END chuan, September 1, 2025-ah Home minister K Sapdanga hoin Operation Jericho ṭan a nih thu an tarlang a, "Mizoram Police, Excise & Narcotics Department leh Central YMA hnuaia branch hrang hrang leh khawtlang hruaitu hrang hrangte'n ṭhahnemngai takin ruihhlo do beihpui thlakna hi an kalpui mek zel a. Hun dang aiin ram pawn lam aṭanga ruihhlo lo lut pawh a tlem a, ruihhlo lo lut chhun man pawh a san phah hle a ni," an ti.

Operation Jericho hnuaiah Police leh ramri hrûla awm khuate'n ramri aṭanga ruihhlo lo lut tur doin theihtawp an chhuah mek tih END chuan an tarlang a; END pawhin ruihhlo hmangsualtute laka mipui an him zawk nan khawpui hrang hrangah patrolling uluk taka an neih ṭhin thu an tarlang bawk.