Kum 2024-25 chhungin mei zu mi 444 man

Nimin khan Direc-torate of Hospital & Medical Education (DHME) auditorium-ah National Tobacco Control Programme (NTCP) hmalakna thlirhona leh thawktute intuaitharna hun hman a ni a; sorkar kum liam ta April 2024 - March 2025 chhungin puipunna hmunah mei zu mi 444 man an nih thu an tarlang.

Ṭhutkhawma tarlan danin, sorkar kum liam ta chhung khan puipunna hmun, meizuk phak lohna hmuna mei zu an awm leh awm loh vawi 418 endik a ni a, chutah chuan puipunna hmunah mei zu mi 444 man an ni. Vaihhlo leh a kaihhnawih ti ṭhin, ti tawh lo tura intiam mi 6,645 an awm.

April 2024 - March 2025 chhung vêkin NTCP hnuaiah vaihlo ṭhat lohzia inzirtirna (awareness campaign) zirna-in hrang hrangah vawi 291 leh, kohhran leh pawlah vawi 62 buatsaih a ni a, training vawi 40 buatsaih a ni.

Ṭhutkhawmah hian Mizorama vaihlo zûk leh hmuam donaa hmalaknate thlirhona a ni a; tun dinhmunah Mizoramah tleirawl kum 13-15 inkarte zingah zûk leh hmuam ti 58% an awm thu tarlan a ni. Ṭhangthar naupang zawkte'n zûk leh hmuam leh ruihhlo an tih lohna tura theihtawp chhuah a pawimawh thu te, zûk leh hmuam sim duhte tan pawh district hospital tin leh Mizoram State Cancer Institute-a Tobacco Cessation Clinic pan theih a nih thu an sawi.

NTCP Yearly Review meeting & Refresher Training hi NHM mission director Dr Lily Chhakchhuak-in a hmampui a; district hrang hranga thawktute telin, HME additional director (Dental) Dr Zoramthangi Renthlei, NTPC state nodal officer ni bawkin a kaihruai a ni.