NE-ah khualzin hîp luha hmasawn ber kan ni - CM

Chief minister Lalduhoma chuan nimin tlai khan Champhai Zotlang Mualah Hnahsin Kût 2025 a hawng a; Mizoramin tourism sector hmanga sum tak tak hmuh theihna a neih thu leh Mizoram chu kum 2024 chhunga hmarchhaka khualzin hîp luh kawnga hmasawn ber a nih thu a sawi.

CM Lalduhoma chuan, Mizoramah hnam dangte an rawn zin a, ram mawina leh boruak nawmna an rawn hmuh ṭhin thu sawiin, "Khualzin hîp luh theihna remchang kan ngah tih an hria a ni. Keimahni zawkin kan hmang thiam mai si lo. Theihna tam tak nei a, hmang chhuak thiam si loin kan awm reng ṭhin. Tunah chuan ṭhangthar fingvar zawk an lo chhuak a, Tourism department pawhin tourism sector a kalpui thiam tial tial," a ti.

Kum 2024 chhungin Mizoram chu hmarchhaka khualzin hîp luh lama hmasawn ber a nih thu sawiin Lalduhoma chuan, "Khualzin mi 5,20,000 chuangin Mizoram an rawn tlawh a, a kum hmasa aia a punna chu 139.50% a ni. Rêlin Sairang a rawn thleng ta a, khualzin an pung hle turah kan ngai," a ti a; Mizoram chu an enkawl thiam a, khawtlang nun mawi tak an zawrh thiam bawk chuan sum leh pai tam tak hmuh theihna leh Mizo hnam chawi larna remchang a nih thu a sawi.

Chief Minister chuan, khualzin tana tlawh nuam taka insiam thiam chu tourism-a a pawimawh lai a nih thu sawiin, "Kan ram mawi tak an rawn hmuh rual hian Zo nun ze mawi, tlawmngaihna, rinawmna, mikhualte chunga ṭhat chhuah ṭhin hnam kan nihnate hi rawn hmu tel ngei se. Khualzin rawn kal tam ber turte hi foreigner an ni lo a, kan Indian-puite an ni. Vai rawn zin hi lo táwngpáwng hlauh ngawt tur a ni lo. ILP neiin an rawn lut a, an haw a hunah an haw ve leh mai dawn a ni," a ti.

Champhai district chu zin khawthawn nana hmun ṭha a nih thu sawiin Lalduhoma chuan, "A ram a nuamin a mawi a, pipu sûlhnu tam tak a awm a, kan zawrh thiam phawt chuan local tourist ringawt pawh tam tham tak hîp theih a ni. Keimahni leh keimahni kan intlawh tawn a, khawi hmunah emaw sum leh pai kan han hmang chhuakte hi tourism hmanga economy kan inchawi kan tawnna a ni," a ti a; mipui hîp thiam apiangin an chhawr dawn thu a sawi.

Hnahsin Kût Organising Committee chairman Dr Samuel Laldinthara chuan, an tum ber chu khualzin hîp a nih thu a sawi bawk.

Kumina Hnahsin Kût hi a ṭum hnihna a ni a; Champhai Nature Conservancy, Zotlang Branch YMA, Champhai District Photographers Society, Champhai North Joint VC, Champhai South Joint VC, Zotlang, New Champhai leh Tlangsam VC te ṭanghoin Champhai mipui behchhana an buatsaih a ni. Kût hian October 17, 2025 thleng a awh ang.