SSA-a zirtirtute'n High Court thu anga dah nghet turin Mizoram sorkar an phût

Samagra hnuaia primary school leh middle school zirtirtute intel khawm, Mizoram SSA Teachers Association (MSSTA) chuan, Gauhati High Court thutlukna angin SSA (Samagra) zirtirtute dah nghet turin Mizoram sorkar an phut.

MSSTA chuan thuchhuah siamin, Mizoram sorkarah an chanvo an chang loa an inhriat avangin September 19, 2019 khan Mizoram sorkar khinna Gauahati High Court-ah an thehlut tih an tarlang a, "17.03.2023 khan High Court chuan thutlukna min siamsak ta a, SSA zirtirtute dah ngheh dan tur point pathum a siam," an ti.

MSSTA tarlan danin, High Court chuan Mizoram sorkar chu Right to Education Act (RTE) Rules zâwm chungin point pathum - P/S leh M/S zirtirtute post ruaka dah luh emaw, SSA zirtirtute tan bika post siam emaw, scheme hmanga a tahtawla dah ngheh emaw thlang turin a ti a; a eng emaw ber hmangin thla ruk chhunga SSA zirtirtute dah nghet turin a ti ni.

Mizoram sorkarin High Court judgement order anga hma a lak loh avangin MSSTA chuan September 29, 2023 khan High Court-ah court judgement zahlohna thubuai, Contempt of Court an thehlut leh bawk.

Mizoram sorkarin June 18, 2024-ah CSS Regularisation Scheme government gazetted a tichhuak tih tarlangin, "A scheme neitu leh siam chhan tu mah dah ngheh an la awm loh laia Health department-a health worker mi 31 dah ngheh an ni ta daih hi vanduaithlak kan ti. Kan sorkar hian Court thutlukna min zahsak a, kan tana káwl êng tur hi harsatna lai min thlirsak lo a, Court Judgement ang taka min dah nghet thuai turin kan phût a ni," an ti.