KHAWTHLIR

Pisa kai hun titawi

Mizoram sorkar pisa kai hun chu nimin aṭang khan darkar khata tihtawi a ni. Pisa kai hun hi nimin aṭanga February 13, 2026 thlengin Mizoram chhung leh hmarchhak state-a Mizoram House-ahte zing dar 9 aṭanga tlai dar 4 a ni dawn a; Delhi, Kolkata, Mumbai leh Bengaluru-ah chuan zing dar 9:30 aṭanga tlai dar 5:30 a ni ang.

RTI Week hmang

October 5-12, 2025 chhung hi Right to Information (RTI) Week a ni a, RTI Week pual hian nimin khan Lunglei DC Conference Hall-ah hun hman niin, additional DC Rochuangkimi Khenglawt-in a hmanpui. Rochuangkimi Khenglawt chuan, RTI chu online leh offline-a a kal kawp tawh avangin uluk lehzuala vil turin sorkar office hrang hranga RTI kaihhnawiha mawhphurtute a chah. Lunglei IPRO C Lalhruaitluanga'n RTI Act chungchang a sawifiah bawk.

Minister-in hlan

Land Revenue & Settlement minister B Lalchhanzova chuan nimin khan LRS department video conference room-ah SVAMITVA Scheme hnuaiah Sesawng VC I, II leh III hnenah property card a hlan. Property card hi drone hmanga ram survey hnua ram pass siam a ni a; hei hi LSC nena intluk niin, mipuiin an ram neih tihchian nan te, bank-a loan lak nan te, ram ei leh hralh thilahte leh land acquisition-ah hman theih a ni.

Sikserh inzirtir

Assam Rifles chuan nimin khan Siaha district-a Lungpuk khuaah sikserh laka inven dan inhrilhfiahna hun an buatsaih. He hunah hian Lungpuk khaw mi 25 an tel a, sikserh lan chhuah dan te, sikserh laka inven dan te, tih tur leh tih loh turte an zirtir a ni.

A hmuna vil rêl

Lawngtlai District Monitoring Committee for Bána Kaih chu nimin khan bawrhsap Donny Lalruatsanga hoin DC conference hall-ah an ṭhu a; Bána Kaih (Handholding) scheme hnuaia progress partner-te hmalakna a hmunah ngei kala vil an rêl. Progress partner zinga hlawhtlingte mipui hmuh theih tura tarlan ṭhin ni se, an ti bawk.