Lungleiah National Wildlife Week hmang

Environment, Forests & Climate Change (EFCC) Department-a Lunglei Forest Division huaihawtin nimin khan Lungleiah National Wildlife Week (Nungcha Humhalh Hapta) hman a ni a, thupui chu 'Mihringte leh nungchate inhne rem taka khawsakho' tih a ni.

National Wildlife Week 2025 pual hian zing karah kea kawngzawh (walkathon) buatsaih a ni a, Lunglei SP J Lalmuankima'n a vailiam. Lunglei Police, 92 Bn Border Security Force (BSF), 152 Bn BSF leh 20 Bn Assam Rifles mi te, Lunglei Bazar Branch YMA member te, EFCC leh department danga thawkte an tel a; Lunglei Chanmari aṭanga Bazar Venga Forest Complex thleng an kal.

Chawhnuah J Buana College multipurpose hall-ah National Wildlife Week hman a ni a, Lunglei divisional forest officer Solai Azyu-in kaihruaiin, Lunglei SP leh Wildlife Crime Control Sub-Unit chairman J Lalmuankima khuallian a ni.

J Lalmuankima chuan, Mizote thinlungah pasalṭha ngaihsanna a intuh nghet hle tih sawiin, mihringte leh nungchate khawsakhona leh hma lam hun atana pawi lo zawnga pasalṭhat dan inzirtir a ṭul thu a sawi a, "Nungchate enkawl chungchangah hawihhâwm leh rilru nei taka kalpui a ṭul a, ngaw leh luia nungchate man leh lak dawn pawhin danin a phal chinah chauh ren tak leh inkhawl khawm zel thei tura mahni mamawh chin chauh lak inzirtir uar a ṭul," a ti.

Inkhawmah hian Lunglei College-a Zoology associate professor R Lalro-chama'n mihring leh nungchate inrem tak leh intibuai loa khawsakho theihna tura thil pawimawhte a sawifiah a ni.

National Wildlife Week hi India ramah kum tin October 2-8 chhung hman ṭhin a ni.