Nasa takin hma kan la - LRS Minister

Mizoram Civil Service (MCS)-a tling tharte tan nimin aṭang khan Land Revenue & Settlement (LRS) department conference hall-ah Revenue Orientation Training Programme buatsaih a ni a; training hawngtu LRS minister B Lalchhanzova chuan, an sorkar hnuah nasa taka hma an lak thu a sawi.

B Lalchhanzova chuan, India rama civil service hlawm lian IAS leh state civil service-te chu an Revenue mi leh sa hle ṭhin tih a sawi a, "Thûk takin Revenue department enkawlnaah an tel a, MCS officer-te pawhin Revenue rilru in pu a ni. Kan sorkar hnuah nasa takin hma kan la a, chung zingah chuan settlement officer-te assistant commissioner (revenue) a thlak a ni mek a, hei hian Revenue administration-ah nghawng ṭha tak a neih kan beisei," a ti.

DC office-a sub-deputy commissioner (SDC) zingah SDC (Revenue) designate tum a nih thu sawiin Lalchhanzova chuan, "MCS officer lut tharte chuan service a an luh tirh phat aṭangin Revenue experience an nei thei tawh dawn a, an service zelna tur atana thil pawimawh tak ani dawn a ni," a ti a; MCS officer-te chu an exam laia General Studies-a ethics paper chu a taka hman hun a nih thu a hrilh.

LRS Minister chuan, dikna leh rinawmnate kengkawh a, anmahni dawrtu mipui lakah pawh hawihhâwm tak leh zahawm taka awm ṭhin turin chah a, "Dan leh hrai bel hle rawh u. In bel chuan mipui leh ram tana thil ṭha leh thil thar ngaihtuah leh chin chhuah kawngah nasa takin in ṭangkaipui ngei ang," a ti.

MCS tharte hian chawlhkar khat chhung Land Revenue & Settlement department hnathawh dan leh kalphung an zir dawn a ni.