Hmasawnna hnathawhte a hun taka zawh ṭhin a ṭul - CM

Chief minister Lalduhoma hoin nimin khan CMO conference hall-ah Special Assistance to States for Capital Investment (SASCI) hnuaia hmalak dan thlir let a ni. CM chuan, hmasawnna hnathawhte a hun taka zawh ṭhin a ṭul thu leh thawktute inthlahdah loh a ngaih thu a sawi.

CM Lalduhoma chuan, SASCI chu department hrang hrang kaltlanga hmasawnna hna thawhna tur a nih thu a sawi a, "Hmalaknate a hun taka zawh ṭhin a nih theih nan ngaih pawimawh a ṭul. Department ṭhenkhata thawktute inthlahdahnain SASCI kaltlanga ṭha taka hna thawktu department dangte a tihkhawtlai phah theih avangin thawktute inthlahdah loh a ṭul," a ti.

SASCI hnuaia hnate ṭha taka thawh a nih chuan a kum leha ruahmanna siam dan tur nasa takin a hril thei tih sawiin Lalduhoma chuan, department hotute chu a hun taka hna zo fel hman turin a chah. A ṭul dan azirin department hrang hranga thawktute indawr tawn zung zung ṭhin tur a nih thu sawiin, an hnuaia thawktute uluk taka vila enpui ṭhin turin department hotute a chah bawk.

Ṭhutkhawmah hian Home minister K Sapdanga, PWD minister Vanlalhlana, Forest minister Lalthansanga, Agri-culture minister PC Vanlalruata, Health minister Lalrinpuii, Power & Electricity minister F Rodingliana, Sports & Youth Services minister Lalnghinglova Hmar leh adviser to CM (Finance & Planning) TBC Lalvenchhunga an tel a; official aṭangin SASCI kalpuitu department secretary, director leh hotu dangte an tel.

Kum 2024-25 chhunga project kal lai, expenditure sanction la awm lote leh PWD hnuaia Working Women Hostel sak hna chak zawka bawhzui dan tur leh, PM Ekta Mall (Unity Mall) sak hna sâwt zawka kalpui dan turte an sawiho a ni.

Finance secretary Ram-chuana'n Finance department buatsaih kum 2020-25 chhunga SASCI hnuaia project hrang hrang dinhmun a tarlang.