A thlâwna ha entirna buatsaih mek

Health and Family Welfare minister Lalrinpuii chuan nimin khan Civil Hospital, Aizawlah Health department, Indian Society of Prosthodontics Restorative Periodontics (ISPRP) leh Mission Foundation Movement (MFM) buatsaih Free Dental Camp a hawng. Camp hi vawiinah chhunzawma zawh a ni ang.

Free Dental Camp-ah hian Dubai aṭangin Prof. Dr Lovely Muthiah Annamma leh professor dang pathum an tel a, Asan Dental College, Chennai aṭangin internship ti lai mi pathum an tel bawk. A thlawna ha (dental) entir duh tan Civil Hospital OPD card hmangin inentir theih a ni.

Minister Lalrinpuii chuan, ram pawn aṭanga doctor thiam tak tak an lokal chu a lawm thu a sawi a, "Mizo mipuite’n he hun hi hlâwkpui ngei se ka duh a, a tam thei ang ber inentir turin ka sâwm a ni," a ti.

Mizote'n zûk leh hmuam an ti nasa a, natna hlauhawm tak tak vei an tam phah thu sawiin Lalrinpuii chuan, "Zûk leh hmuam leh kuhva lakah inthiar fihlim a pawimawh," a ti a; Free Dental Clinic-ah inentir mai ni lo a, an ká leh a vel vawn fai chungchangahte thil ṭha zawk zir chhuah tum ṭheuh turin mipui a chah a ni.