Down syndrome nei mi 80 ziak lut tawh; Down Syndrome Awareness Month hawng

Social Welfare minister Lalrinpuii chuan October 4, Inrinni khan Millennium Centre tualah October thla chhunga hman tur 'Down Syndrome Awareness Month' a hawng.

Awareness hawnna inkhawm hi Mizoram Down Syndrome Association (MDSA) buatsaih a ni a; hawnna inkhawm zawhah charity concert buatsaih nghal a ni. MDSA hruaitute chuan, an pawlah down syndrome nei mi 80 vel ziah luh an nih tawh thu leh, thingtlang lamah la inziak lut lo eng emaw zat an awma an hriat thu an tarlang.

Social Welfare Minister chuan, down syndrome chu natna a nih loh thu sawiin, "Inthlah chhàwnna lam dik tâwk lo vanga mi bik nihna (genetic linked disability) zawk a ni a, tun thlengin down syndrome thlen chhan hi an la hre chhuak lo chungin, naute nu an upat hian down syndrome awm theihna chance a sang zel a ni tih an sawi. Kan inven theihna ber chu fa neih hma a ni a, nupui pasal kan inneih hma a ngai," a ti a; down syndrome neite hmangaih taka dâwmkângtu ni turin mi tin a sawm.

Mizoramah down syndrome nau piang an awm chho ve zel tih sawiin Minister chuan, "Down syndrome naupangte'n thliarhranna te, ngaihdan mâwlmang tak taka enna leh endawngnate an lo tuar tawh ṭhin. Hetiang an tawrh tawh lohna turin kohhran, khawtlang leh zirna-inahte inzirtirna neih a pawimawh," a ti.

Lalrinpuii chuan, down syndrome neite'n hriselna ṭha an neih theih nan leh zirna ṭhate an dawn theih nan hmalak a ṭul thu sawiin, "Zirna-in leh healthcare lama thawkte'n ṭan an lak thar a pawimawh," a ti a; down syndrome-te chu zirna-in, kohhran leh khawtlangah an nihna anga pawm leh kan pawm a ni tih lantir a pawimawh thu a sawi.