LADC-ah voter 56,857 an awm

Lai Autonomous District Council (LADC) inthlanpui vawi 12-na neih leh huna hman tur electoral roll siamṭhat chu September 30, Thawhlehni khan district election officer Donny Lalruatsanga, Lawngtlai bawrhsapin DC conference hall-ah a tlangzarh. LADC chhungah voter 56,857 an awm.

LADC electoral roll thara a lan danin, LADC huam chhungah hian voter 56,857 awmin, mipa 27,844 leh hmeichhia 29,013 an ni a; polling station zingah Pangkhuaah voter tam berin, mi 1,189 an awm a, voter tlam berna polling station Hmawng-buchhuahah voter pakhat a awm a ni.

Electoral roll tlangzarhnaah hian political party aiawh an tel kim a, party aiawhte hnenah DEO chuan electoral roll a hlan a ni.

Donny Lalruatsanga chuan, LADC chu râltlân leh ram dang mi awmna a nih avangin fimkhur a ngai hle tih sawi a, "Uluk leh fimkhur takin kan ti a ni," a ti.