Larsapin Sairang rêl chawlhhmun tlawh

Governor Gen. Dr Vijay Kumar Singh chuan nimin khan Sairang rêl chawlhhmun a tlawh a; Northeast Frontier Railway (NFR) hotute chu rêl chawlhhmun enkawl leh tihchangtlun zelna turah theihtawp chhuah turin a chah.

Larsap chuan, India Railway network-ah Aizawl (Sairang) a tel ta chu a lawm thu sawiin, "India ram khawpui pawimawh tak takte awlsam taka rêl hmanga thlen theih a ni ta hi a lawmawm hle. Rêl service mumal leh khaihlak lo, mipui tana awlsam leh him, faina leh kawng tinrenga ram chhung hmun dangte entawn tlak siam turin theihtawp chhuah tlan a ṭul," a ti.

NFR deputy chief engineer Harjimal Meena chuan Governor hi Sairang rêl chawlhhmun dinhmun tlangpui a hrilhfiah a; Badarpur area manager Virendra Kumar Meena pawhin hmalakna leh hriat tur pawimawh dangte a hrilhfiah bawk.