CM hoin Bâwm hnam kût hman a ni

Mizoram Bâwm Student Association chuan nimin khan Lunglei district-a Khawmawi khelmualah Bâwm hnam kût - Tlanglut Kût leh International Bâwm Cultural Meet an hmang a, chief minister Lalduhoma kût pa a ni a, bialtu MLA Lalramliana Papuia leh Dr Lorrain Lalpekliana Chinzah ten an hmanpui bawk.

CM Lalduhoma chuan, Mizoram mipuite'n hnam pêng anga inlâk hran tumna an làwm lo a, kohhran huanga seng luh pawh ṭha an ti lo tih sawiin, "Kan hnam ziate chu kan humhalhin kan venghim tur a ni a, hnam pêng dangte zia leh tih dan pawh Mizo hnam zia a ni tih kan pawm mai tur a ni," a ti.

Mizo hnam hming pu bik an awm lo tih sawiin Lalduhoma chuan, "Zo hnahthlak hnam hrang hrangte awm khawm hi Mizo hnam chu kan ni mai," a ti a; ṭha taka Mizo hnamte an insuihkhawm theih nan Pathian pawhin a kaihruai hle tih hriat theih a nih thu a sawi.

CM chuan, Bâwm Student Association (BSA) chu Bâwm hnamte hûi khawmtu a nih thu sawiin, "Mizoramah mai ni loin, Bangladesh lamah pawh BSA ṭha takin an ding a, Bâwm hnam tan an hlu hle. Bâwm hian pêng chi 60 vel a nei a, Panghawi leh Sunthla te an lian fâl a, hlawm hnih anga sawi an ni ta ber. Kûtpui pawh a hran nei mah se, Bâwm zawng zawngte hman tlan Tlanglut Kût behchhana Bâwm International Cultural Meet buatsaih hian BSA-in unau inpumkhatna an ngaih pawimawhzia a tilang," a ti.

Bâwm chanchinah lal ropui tak Vanhnuaitlir a awm thu sawiin Lalduhoma chuan, "Ani hian a vanglai chuan tuna Paletwa leh a chhim lam ram zau tak a awp nia sawi a ni. Lal chak leh thil ti thei a nih chhan chu a unau hnam pêng 13 a thawhpui vang a ni," a ti a; Zo fate chu an ṭanrual thiam chuan hnam chak leh thil ti thei tak an ni zel tur thu a sawi.

Chief Minister chuan, Kaladan Multi Modal Transit Transport Project chu tun hnaia kawng siamtu company hotute'n an hrilh dan chuan, kum 2027 thawh zawh tum a nih thu a sawi a, "A puitlin hunah chuan chhim lam bial hi a changkang chak hle dawn a ni," a ti.

Kût hmannaah hian bialtu MLA Lalramliana Papuia pawhin thu a sawi a; hnam lâm leh zaite entir a ni.

Mizoramah Bâwm hnam mi 30,000 vel an awma ngaih niin, LADC leh CADC chhungah an awm tam ber a, LADC bikah Lai dawta hnam pêng lian ber nia sawi an ni. Bangladesh aṭanga himna zawnga rawn raltlan mi 2,500 vel an awm bawk.