KHAWTHLIR

Thisen pe

National Voluntary Blood Donation Day pualin nimin khan Hrangbana College NSS-in Civil Hospital, Aizawl tan thisen unit 64 an pe a, petute mipa 33 leh hmeichhia 31 an ni a; Lunglei HSS NSS-in Civil Hospital, Lunglei tan unit 44 an pe a, mipa 32 leh hmeichhia 12 an ni. Champhaiah Joint PYD (NEI)-in unit 38 pein, mipa 30 leh hmeichhia pariat an ni a, Lawngtlaiah Region HSS NSS-in unit 49 pein, mipa 33 leh hmeichhia 16 an ni. Nimin vêk khan KṬP, Armed Veng North Branch-in an din champha pualin Synod Hospital tan thisen unit 35 an pe a, petute mipa 28 leh hmeichhia pasarih an ni.

ACB-in awarness campaign buatsaih

Directorate of Anti Corruption Bureau, Mizoram chuan nimin khan Synod Higher Secondary School-ah Anti-Corruption Awareness Campaign cum Signature Campaign an buatsaih. ACB SP Lalbiakkila leh inspector Michael Ramdinthara ten eirukna nihphung te, eirukna chu ram hmasawnna dâltu lian tak a nih dan te, eirukna donaa zirlaite pawimawhnate an sawi a; zawhna leh chhanna hun hman a ni bawk.

Mamawh thlen

Chief minister Lalduhoma chu Khawmawi khawtlang hruaitute'n nimin khan an khuaah an kâwm a; mobile phone signal ṭha an mamawhna thu te, an khaw ram Hmeithai tlang panna kawngpui ṭha an mamawh thu te, community hall an mamawh dan te, thlasik thlai chînna hmunpui an nih angin collection centre an mamawh thute an thlen. CM hian Khawmawi mamawhte chu a bawhzuisak tur thu a hrilh a ni.

BSF crash course

Mizoram Youth Commission (MYC) buatsaih Crash Course for BSF Written Exam chu nimin khan MINECO-a MYC Coaching Centre-ah ṭan a ni a, MYC chairman Malsawmzuala Ralte-in a hmanpui.

Lunglei Ni

Lunglei Municipal Council (LMC) ruahmannaa 'Lunglei Ni' hman tur atana Organising Committee chu tun hnai khan LMC BoC Meeting Hall-ah LMC chief executive officer Malsawmtluanga kaihhruaiin an ṭhukhawm a; zirchianna hrang hrang behchhanin ṭhut khawm leh hunah Lunglei din ni tihchian tum ni se, an ti.

AR-in meth man

Assam Rifles chuan September 30, Thawhlehni khan Khawzawlah mi pakhat hnen aṭangin methamphetamine kg 6.87 an man a, Khawzawl police-te hnenah an hlan. Meth kengtu mipa pakhat chu an man hmain a tlanchhia niin an tarlang.

Kawng khar dawn

Electric Veng Sakawrpului aṭanga Zirtiri College via TKV Tuikhur inkar kawnga thawm ṭhat a nih dawn avangin vawiin aṭanga October 4, 2025 thleng ni tin zing dar 9 leh tlai dar 5 inkarah kawng khâr a ni dawn tih Traffic SP Ruatsanga Ralte-in a tarlang.