Thisen pe ṭha chawimawina dawng

Mizoram chuan nimin khan Directorate General of Health Services, Ministry of Health & Family Welfare hnuaia Blood Transfusion Services aṭangin a thlâwna thisen peka ti ṭha chawimawina, Blood Donation Award a dawng.

Nimin khan AIIMS, New Delhi-ah National Voluntary Blood Donation Day hman a ni a; he hunah hian kum 2024 chhunga voluntary blood donation-a India hmarchhak biala ti ṭha ber Mizoram hnenah chawimawina hlan a ni. Award hi Mizoram aiawhin Dr Hmingthankimi Ralte, OSD-in a dawng.

Mizoramin hmar­chhak state zinga ti ṭha ber Blood Donation Award a dawn theihna chhan chu a thlâwna thisen pe ṭhinte vang a nih thu sawiin, thisen pe ṭhinte zawng zawng chungah an lawm thu Mizoram State Blood Transfusion Council chuan an tarlang.