Mizoramah Upate Ni hman a ni

Nimin October 21 kha International Day of Older Persons (Upate Ni) a ni a, Mizoram hmun hrang hrangah hman a ni.

Social Welfare department leh National Programme for Health Care of the Elderly (NPHCE) chuan Chanmari YMA Hall-ah Upate Ni an hmang a, Social Welfare minister Lalrinpuii khuallian niin, Mizoram Upa Pawl (MUP) Gen. Hqrs president Nghaklianmawia leh MHIP Gen. Hqrs president Lalliani te pawh an tel.

Minister Lalrinpuii chuan, sorkar laipui thupek angin district hospital tinah geriatric bed (upate mutna tur khum) 10 dah tura tih a nih angin ruahmanna siam a nih thu a sawi a; Old Age Pension pek tlai chungchang sawifiahin, "State sorkarin a tih tur chin ti mah se, sorkar laipui aṭanga dawn a tlai a, old age pension chauh ni lo, scheme dangte nen a hlawma lokal a nih avangin a ruala pek chhuah theih hun nghah a ngaih vang a ni," a ti.

Upate chu khawtlang tan an hlut thu sawiin Lalrinpuii chuan, "Aia upate zahna leh chawimawina nun kan chhawm tlan vek a pawimawh," a ti a; upate puala sorkar hmalakna hrang hrang a sawi bawk.

Chanmari YMA Hall-ah Upate Ni hmannaah hian kum 100 tling tawh mi pakua hnenah lawmpuina hlan a ni a, chungte chu mipa pathum leh hmeichhia pakua an ni. Social Welfare secretary Lalzarmawii'n khawtlanga upate ṭangkaina leh pawimawhna a sawi a, Dr Eric Zomawia'n upate tana inenkawl dan ṭha a sawi a ni.

Minister Vanlalhlana chuan a bial chhunga Lily Veng Baptist Kohhran Hall-a Upate Ni hmanna a hmanpui a; Lily Veng MUP member kum 90 chunglam mi panga hnenah chawimawina hlan a ni. Vanlalhlana chuan, Mizoramah tar pension la kum 60-79 inkar mi 17,167 leh kum 80 chung lam mi 7,357 an awm thu a sawi.

Upate Ni hi Tuikual North MUP-in an veng YMA Hall-ah an hmang a, bialtu MLA Lalnghinglova Hmar, minister of state-in a hmanpui.

Lalnghinglova Hmar chuan, tunlaiah Mizo ṭhalaite zingah naupang tak taka thi an tam thu sawiin, kum tam tak dam chu malsawmna ropui tak a nih thu a sawi a; upate chu rei tak hrisel taka an dam theih nan mahni insawizawi uar tur leh ei leh in hriselte ei ṭhin turin a chah.

MUP, Maubuang Branch pawhin nimin khan Awithangpa Hall-ah Upate Ni an hmang a, an kum 50 tlin an lawm nghal. He hun hi Mizoram Cooperative Apex Bank chairman Lalnunsanga'n a hmanpui a ni.