Education Minister-in kohhran & khawtlang vanga sikul ngaihthah lo turin zirtirtute a chah

Education minister Dr Vanlalthlana chuan, kohhran leh khawtlang rawngbawlna ngaih pawimawh vanga sikul kal tlai, bân hun hmaa haw leh pâwl (class) lâk ṭhulh awm tawh lo se a duh thu a sawi.

Dr Vanlalthlana hian nimina Synod Conference Hall-a Mizoram Secondary School Teachers’ Association (MISSTA) Silver Jubilee lawmna leh General Conference a hmanpuinaah thu sawiin, "Kohhran leh khawtlang rawngbawlna ngaih pawimawh vanga sikul kal tlai, bân hun hmaa haw leh class lâk ṭhulh hi awm tawh lo se," a ti.

Rawngbawlnain zirna tibuai lo se a duh thu sawiin Education Minister chuan, zirtir hna aia rawngbawlna lama tui zirtirtute chu fulltime-in inhmang tlang law law zawk mai se a duh thu a sawi a; headmaster-te chu inthununna ṭha taka kengkawh turin a chah.

Dr Vanlalthlana chuan, MISSTA member-te chu thawhhona ṭha tak nei zel turin a chah a; sikul tihchangtlunna tura sorkarin hma a lak dante sawiin, zirtirtu leh non-teching staff indaih lohna tiziaawm turin theihtawp chhuah mek a nih thu a sawi bawk. Minister hian MISSTA silver jubilee lungphek a hawng a, silver jubilee magazine a tlangzarh bawk a ni.

MISSTA inkhawmpui hi an vice president VR Vulmawia’n a kaihruai a, general secretary Azaria Laltinkima’n report pein, president C Lalremruata’n thuchah a sawi. MISSTA member pensioner-te thlahna hun leh state awardee-te chawimawina hun hman a ni a; chawhnu lamah ro an rel bawk.