Sorkar thawhpui thiama hma hruaitu nih hi a bata kan bat a ni - Speaker

Assembly speaker Lalbiakzama chuan, sorkar thawhpui thiam lama hma hruaitu leh entawn tlak nih chu thil tih atana mawi ni satliah loin, a bata bat a nih thu a sawi.

Speaker hian nimin khan Phullen community hall-ah Phullen MUP-in MUP Day an hman a hmanpui a; rilru zau put a pawimawh thu sawiin, "Kawng tinrêngah, ringtu nunah te, khawvel inawpna thil politics te, tlawmngai pawl leh mimal rilru sûkthlêk chenin rilru zau, thinnel, khaw ṭangrual, sorkar thawhpui thiam lama hmahruaitu leh entawn tlak nih hi kan tiha mawi a ni satliah lo a, a bata kan bat a ni tih kan hre reng tur a ni," a ti.

Lalbiakzama chuan, upate chu tuna ṭhalaite khawvel hman mek siamtute an nih thu sawiin, "Ṭhalaite hian hetiang dinhmun min siamsaktu Pathian leh upate hnenah hian lawmthu kan sawi fo tur a ni. Tunlaia Mizo ṭhalai thi kan tam dan ngaihtuah chuan kum 70 chu sawi loh, kum 60 dam pawh a hnam nâwlpui ang chuan thil huphurhawm a ni ta hial," a ti a, Phullen khuain kum 80 chawimawi tur eng emaw zat an nei chu ropui a tih thu a sawi.

Phullen MUP Day lawmna inkhawm hi an president B Lalnun-tluanga’n a kaihruai a, khawtlang hruaitute leh tlawmngai pawl hrang hrang aiawhte an tel a ni.