Voluntary Blood Donation Day-ah Hmeichhia thisen pe tamte chawimawi

Nimin October 1 kha National Voluntary Blood Donation Day (NVBDD) a ni a, Mizoram State AIDS Control Society leh Association for Voluntary Blood Donation huaihawtin Mizoram hmun hrang hrangah hman a ni. Day hmannaah hian Mizo hmeichhia thisen pe ṭhate hnenah chawimawina hlan a nih bakah, thisen pek huaihawt a ni.

NVBDD hi Aizawlah chuan Hrangbana College Golden Hall-ah hman a ni a, MLA Jeje Lalpekhlua'n a hmanpui. Mizo hmeichhe zinga thisen vawi 20 pe tling tawhte leh college/university zirlai (hmeichhia) ni mek zinga thisen vawi 10 pe tling tawhte hnenah chawimawina hlan a ni a; AVBD treasurer F Lalmuanpuii kaihhruaiin kalkhawmte chuan thisen pe zel tur leh a thlawna thisen pekin hma a sawn zel theih nan intiamna thu an sawi rual.

Jeje Lalpekhlua chuan, damlote nunna chhanna atana thisen petute a chhuan thu leh hmeichhia ṭhahnem takin vawi tam tak thisen an pe tawh chu ropui a tih thu a sawi a, "Hmeichhe donor kan chawimawite hi ka tluk loh vekte in ni a, ka chhuang tak zet che u," a ti.

Ṭhalaite chu Mizoram hma lam huna mi pawimawhte an nih thu sawiin Jeje Lalpekhlua chuan, "Tuna kan ram hruaitute hi an hun a liam dawn a, tuna ṭhalaite hi kan hun a thleng ve dawn. Kan theihtawpin Mizoram nuam i siam ang u," a ti a; ruihhlo laka fihlim tur leh theihtawp chhuaha ruihhlo do turin ṭhalaite a sáwm.

MSACS project director Dr Jane Rinsangi Ralte chuan, thisen pekah Mizo hmeichhiate'n an thawh hlawk hle tih sawiin, "Female donor hi natonal average-ah 4% a nih laiin Mizoramah chuan 30% lai a ni a, Mizo hmeichhiate kan chhuanawm hle," a ti a; kum 2024-25 chhunga Mizorama voluntary blood donation 93.71% a tlin theih chhan chu Mizoram mipui vang a nih thu sawiin, thisen petute zawng zawng chungah a lawm thu a sawi.

AVBD president C Lalnunnema chuan, NVBDD chu October 1, 1975-ah hman ṭan a nih thu leh Mizoramah chuan kum 1999-ah hman ṭan a nih thu a sawi a, "Kuminah hian blood donation camp buatsaih bakah, thisen pe ṭhin hmeichhiate chawimawina ni atan kan hmang a ni. Mizo hmeichhiate hi an chhuanawm tak zet a, kan hmeichhiate avangin Mizoram hian kawng hrang hrangin hmingṭhatna kan khum mek a ni," a ti.

NVBDD hmanna inkhawmah hian Hrangbana College principal Pu Lalthleng-liana Hrahsel pawhin thu a sawi bawk.