Dampa bialah voter 20,790 an awm

Mizorama assembly constituency no. 2 Dampa biala by-election neih huna hman tur electoral roll chu nimin khan district election officer K Laltlawmlova, bawrhsapin Mamit DC Conference Hall-ah a tlangzarh a; voter 20,790 an awm.

Tlangzarhna inkhawmah hian election officer Lalnunfela Chawngthu-in Dampa final electoral roll dinhmun a sawifiah a; a sawi danin, Dampa bialah voter 20,790 an awm a, mipa 10,605 leh hmeichhia 10,185 an ni. Final roll-ah hian draft roll aiin voter 385-in an tam zawk. Service voter 115 a awm bawk.

Dampa bialah hian polling station 41 a awm a, voter tamna ber polling station - Silsury-I PS-ah voter 1,103 awmin, voter tlemna ber Zopui PS-ah voter 30 an awm.

Mamit DEO K Laltlawmlova chuan, Dampa electoral roll ennawnah a hun taka tlangzarh a nih theihna tura thawktu Elections official-te khawtlang leh tlawmngai pawl hruaitute leh political party-te'n ṭha taka an thawhpui avangin lawmawm a tih thu a sawi a; by-election hunah vote thlak ṭheuh turin Dampa bial mipui a sáwm. DEO hian Dampa electoral roll thar hi political party aiawhte hnenah a hlan nghal a ni.