Ruihhlo awm lohnaah Tlangmawi thlang

Khawzawl district-ah July 10 - September 28, 2025 chhung khan Excise & Narcotics department mite'n zu kaihhnawihah dan bawhchhia mi 35 an man a, thubuai 37 an ziak lut. Khawzawl district-ah hian ruihhlo awm lohna khua - drugs free village atan Tlangmawi thlan a ni.

Khawzawl District Narco Co-ordination Centre (NCORD) chu September 29, Thawhṭanni khan district bawrhsap K Vanlalṭhiana kaihhruaiin an ṭhukhawm a; Khawzawl district drugs free village atan Tlangmawi khua thlangin, ruihhlo supply a tlem theih nan source ṭha tak neih ni se, an ti. October 2025 chhungin ruihhlo leh a kaihhnawih lama ṭhalaite an fihlim theih nan inzirtirna buatsaih an rêl.

Kohhran hruaitute chu an bial fannaahte ruihhlo donaa ṭan la ve turin an ngen a; October thla chhungin sunday school naupangte zingah ruihhlo laka an fihlim theih nan awareness neih an rêl bawk.

Khawzawla END mite chuan July 10 - September 28, 2025 chhung khan MLP Act 2019 hnuaiah thubuai 37 an ziak lut a, mi 35 an man. Zu an mante chu - samzu ûm thum, beer bûr riat, rakzu litre 65, Myanmar zu (BEDC) litre 21.4, fermented rice ṭîn hnih leh bel hnih a ni.