MYC-in awmpui hna thawk duhte tan MaidConnect Project a kalpui dawn

Mizoram Youth Commission (MYC) chuan Bána Kaih (Handholding) Scheme hnuaiah kum 2026 aṭangin Mizo ṭhalai, mi ina awm (awmpui) ni duhte an awmna tur mumal taka zawnpuina tur, MaidConnect Project an kalpui dawn.

Nimin khan MYC chairman Malsawmzuala Ralte kaihhruaiin MYC conference room-ah MaidConnect Project chungchang sawiho a ni a; Mizoram State Commission for Women chairperson C Laldinpuii bakah, Home department, LESDE department, Social Welfare department, Women & Child Development depart-ment hotute leh MHIP Gen. Hqrs hruaitute an tel.

MaidConnect Project hmang hian Mizo ṭhalai, mi ina awm/awmpui turte chu an awmna tur mumal taka zawnpui a ni dawn a, an awmna turte nen inremna mumal tak siam ṭhin a ni ang. Training pek ṭhin an ni dawn a, hlawh chungchang pawh fel taka bituk a ni dawn.

Project kaltlanga awmpui hna zawnsakte chu Employees State Insurance Scheme/ESI-ah ziah luh an ni dawn a, an awmnate'n hlawh an pek aṭangin percent tlemte an peksak ang a, dam loh nikhuaah chumi hmang chuan an inenkawl thei dawn a ni.

Police verification tihtir an ni dawn a, harsatna leh buaina a awm thulhah rang taka chhui chhuah theih a ni dawn. Awmpui mamawhte'n pawisa chawia zawnsak theite an dawr ṭhin pawh Maid Connect hmangin mumal taka khuahkhirh a ni ang. Registration mumal tak nen kalpui tur niin, background check nen kalpui tum a ni bawk.

Project hi MYC-in kum 2026 aṭangin mumal takin kalpui a tum a; MYC office-ah officer kaihhruaina hnuaiah MaidConnect Cell din tur niin, registration, verification, training-te an buaipui dawn a ni.