Vaivakawn Zohnuai tui kawng siam hna enfiah

PHE minister Prof. Lalnilawma chuan September 25, Ningani khan Vaivakawn, Zohnuaia lei chein a tihchhiat Greater Aizawl Water Supply Scheme (Phase - III) tui kawng siamṭhat hna thawh mek a endik a; hnathawktu/contractor-te chu a rang thei ang bera thawk zo turin a chah.

Prof. Lalnilawma chuan tui kawng chhia avanga mipuite'n harsatna an tawk ṭhin chu pawi a tih thu a sawi a; mipui hnenah hriatthiamna ngenin, theihtawp chhuaha hma an lak zel tur thu a sawi.

Vaivakawn Zohnauia GAWSS Phase-III tui kawng chhia siam hna hi Eco Engineering Pvt. Ltd-ten an thawk a; contractor-te chuan khuain a zira harsatna dang a awm loh chuan ni 15 chhunga thawh zawh theih an inbeisei thu PHE Minister hi an lo hrilh a ni.

Sorkar thuchhuah tarlan danin, Zohnuai hmuna SIPMIU tui pipe phum hi kumin ruahtui tla nasa avanga lei che khan ti chhiain, lei hnuaiah tui a pût a, helai hmuna lei hi a chêt tâk reng avang leh veng mipuite tan hlauhthawnawma a lan avangin fur ruahtui tlak tam laia leih laih chêt leh hna thawh chak theih a ni lo.

Tunah hian siamṭhat hna thawh mek zel niin, ruahman anga a kal chuan ni 15 hnuah tui supply chhunzawm theih beisei a ni.