CM kaihhruaiin State Level DISHA ṭhukhawm

Chief minister Lalduhoma kaihhruaiin nimin khan sorkar laipui hmalakna hrang hrang kalpui dan viltu - State Level DISHA Committee (Development Coordination and Monitoring Committee) an ṭhukhawm.

CM Lalduhoma chuan, DISHA Committee chu a hming angin thawhhona (coordination) leh vilzuina (monitoring) keng tel a nih thu a sawi a, "Department-te thawhho kan thiam a, a remchanna apianga thlunzawmna (convergence) kan kalpui a ṭul," a ti a, department hrang hrangten an hnuaia scheme an kalpui danah chak zawka hna an thawh tlân a ṭul thu a sawi.

Ṭhutkhawmah hian sorkar laipuiin central scheme sum hman dan leh inpek dan kalphung thlak danglama SNA-SPARSH hman a nih tak avanga harsatna tawh dante sawi a ni a; central scheme kalpuitu department hrang hrangte dinhmun leh harsatna an tawh dangte ngaihthlaka sawiho a ni.

State Level DISHA Committee-ah RD minister Prof. Lalnilawma chu co-chairman niin, RD Secretary chu member secretary a ni a; committe member-te chu - Rajya Sabha leh Lok Sabha MP, Lunglei West bialtu MLA T Lalhlimpuia, Lunglei South bialtu MLA Lalramliana Papuia, Champhai South bialtu MLA Lt Col Clement Lalhmingthanga, Aizawl South III bialtu MLA Baryl Vanneihsangi, Tuirial bialtu MLA K Laldawngliana leh Palak bialtu MLA K Hrahmo bakah central scheme kalpuitu sorkar department 30 vel hotute, mimal leh tlawmngai pawl aiawh sawmbikte an tel a ni.