Sorkar hna hi a thiam tan chuan a la vâng lutuk lo - CM Lalduhoma

Chief minister Lalduhoma chuan nimin khan a bial chhunga Serchhip Sub-Headquarters YMA Hall-ah Serchhip MLA Trophy Inter School Challenge lawmman a sem a; thu sawiin, a thiam tan chuan sorkar hna a la vàn lutuk loh thu a sawi.

CM Lalduhoma chuan, mi tam tak ngaihdanah chuan sorkar hna a váng tih a nih thu sawiin, "A tak takah chuan, a thiam tan chuan a váng lutuk lo. State sorkar hi chuan hna lak tur a ngah lo nâ a, central sorkar erawh chuan a ngah hle. Tribal qouta kan hnawhkhat zo thei lo zawk a, lehkhathiam hna nei lo kan tam phah a ni," a ti.

Mizo naupangte India rama tribal dangte aia lehkhathiam leh hriam zawk an nih phawt chuan hna a váng lo tih sawiin Lalduhoma chuan, "Chutiang mi an nih theih nan chuan an zirlai ṭheuh an hriat chian a ngai. Vawiina an zirlai hi competitive exam an hmachhawn hunah a la pawimawh vek dawn avangin he inelna hian kawngro a su hle turah kan ngai," a ti a; zawhna kalphung pawh a tunlai ber ber ni zel se a ṭhat thu a sawi.

Chief Minister chuan, Serchhip bial chhunga mahni zirlai hre ber naupangte chawimawi an phúa a hriat thu sawiin, "An kalna sikul leh nu leh pate pawhin lo ngaihlu se, he challenge hrim hrim hi i ngaihlu ang u. Serchhip bial huapa a thiam ber nihah duh tawk lo ila, Mizoram huap leh India ram huap thlenga kan san chuan kan hmakhua a êng a ni. Kum 2023 aṭanga challenge buatsaih ṭhintu Serchhip Teachers' Association chungah ka lawm hle," a ti.

MLA Trophy Inter School Challenge hi primary school aṭanga college/DIET thlenga inelna a ni a, huang (category) pasarihah ṭhen a ni. Sikul 21 aṭangin zirlai 172 an tel a, kuminah hian top 10 chinte hnenah lawmman pek a ni. MLA Trophy senso zawng zawng bialtu MLA-in a tum ṭhin.