Aizawlah Red Run 2025 huaihawt a ni

Mizoram State AIDS Control Society (MSACS) leh Mizoram Athletics Association chuan nimin zing khan Aizawlah '3rd State Level Red Run 2025' an buatsaih a, Health & Family Welfare minister Lalrinpuii'n a hmanpui.

Red Run-ah hian college hrang hranga zirlaite leh ṭhalai kum 17-30 inkar an tel a; R Dengṭhuama Indoor Stadium aṭanga tlan ṭanin, Silai Mual, Melthumah an kual a, R Dengṭhuama Indoor Stadium-ah let lehin, km.10-a thui an tlân a ni. HIV Testing Camp buatsaih nghal a ni bawk.

Health minister Lalrinpuii chuan, Mizorama HIV darh nasa lutuk chu a vei thu leh HIV kai leh kai loh inhriat chian a ṭul tak zet thu a sawi. MSACS project director Dr Jane Rinsangi Ralte pawhin, mahni hriselna ngai pawimawh tur leh HIV kai theihna lakah inthiarfihlim turin zirlai leh ṭhalai kal khawmte a chah.

Red Run-ah hian mipaah Lalhmunmawia, Mizoram Institute of Phar-maceuticals pakhatna a ni a, pahnihna chu TC Lalnunsanga, Hrangbana College a ni. Hmeichhiaah H Ngohlaso, Pachhunga University College pakhatna a ni a, S Malsawmhlui, Lunglei College pahnihna a ni. Mipa leh hmeichhiaa pakhatna leh pahnihnate hi October 9, 2025-a Dimapur, Nagaland-a National Red Run 2025-ah Mizoram aiawhin an tlân dawn a ni.