‘Mizoram CSR Connect peih ṭêp a ni - LESDE Minister

Confederation of Indian Industries (CII) chuan nimin khan New Delhi-a Lalit Hotel-ah ‘North East CSR Connect 2025’ an buatsaih a, minister of state Lalnghinglova Hmar khualzahawm a ni. Miniser chuan, Mizorama CSR invest duhte’n awlsam leh awmze nei zawka an kalpui theih nan ‘Mizoram CSR Connect’ peih ṭêp a nih thu a sawi.

CII-ah hian direct member hi company 9,700 vel awmin, indirect member 3,65,000 vel an awm mek a; CSR Connect hi hmarchhak state-ah CSR sum tam zawk hman a nih theihna tura buatsaih niin, kumin hi a vawi hnihna a ni.

Lalnghinglova Hmar chuan, Mizoram chu state lian lo leh mihring tlemna, CSR pawh dawng tam lo a nih thu a sawi a, "Mizoram hi CSR fund hmanna tur tak state kan ni a, mipui kan tlem avangin investment a langsar hma a, awmzia a nei bik ṭhin. Mizoramin CSR Cell kan nei a, Chief Minister's Office aṭanga vil niin, Mizorama CSR invest duhte’n awlsam, langtlang leh awmze nei zawka an kalpui theih nan Mizoram CSR Connect hman theiha peih ṭêp a ni tawh," a ti.

Mizoram leh hmarchhak state-a CII hmalakna hrang hrangte sawiin Minister chuan, Mizoramah CSR Conclave buatsaih turin CII hotute a sáwm. CSR hmanga hmasawnna ngêlnghet thlen tura Mizoram leh hmarchhak state lam hawi turin kal khawmte a sáwm a; Mizoramin sports leh skill development hawi zawnga CSR fund-te hmang turin corporate-te a ngen bawk.

CSR Connect-ah hian thupui pahnih - 'Corporate best practices: Driving scalable CSR in the Northeast' leh 'NGO capacity building: Compliance, accessing CSR funding & strengthening partnerships' tihte sawiho a ni a; hmarchhak state aiawhte’n an state ṭheuha CSR hmanna tur ṭha an neihte an tarlang a, Mizoram aiawhin Mizoram State Sports Council secretary Henry C Lalrawnkima'n a sawifiah.

Mizoram aṭangin Mizoram Youth Commission chairman Malsawmzuala Ralte, Labour, Employment, Skill Development and Entrepreneurship director John Ṭanpuia bakah, CSR Cell Mizoram leh MYC hotu te, Mission Foundation Movement, Goodwill Foundation leh Zo Inspiration aiawhte an tel bawk.