Governor-in Rashtriya Poshan Maah leh Swasth Nari, Sashakt Parivar a hawng

Rashtriya Poshan Maah (National Nutrition Month) vawi 8-na leh Swasth Nari, Sashakt Parivar Abhiyan (Healthy Woman, Empowered Family) chu nimin khan Prime Minister-in a hawng a, Mizoramah pawh Governor Gen. Dr Vijay Kumar Singh-a'n Assembly Annexe Conference Hall-ah a hawng.

Assembly Annexe Conference Hall-a hawnna inkhawmah hian prime minister Narendra Modi-a'n India ram pum tana Dhar, Madhya Pradesh aṭanga a hawnna online kaltlangin chhim nghal a ni a; Health minister Lalrinpuii pawh a tel.

Gen. VK Singh chuan, Swash Nari Sashakt Parivar Campaign leh Rastriya Poshan Maah te chuan rah ṭha a chhuah ngei a beisei thu a sawi a; India rama nausen thihna, Infant Mortality Rate (IMR) hniam ber (nau piang 1,000-ah 13 thi) zinga Mizoram a tel chu lawmawm a tih thu sawiin, "Hei hian naupang leh nau piang hlimte enkawl kawnga Mizoram hmasawnzia a tarlang," a ti.

Rashtriya Poshan Maah hi September thlaah hman ṭhin a ni a, kuminah chuan September 17 aṭanga October 16 thleng hman tur niin, thupui chu 'Healthy Woman, Empowered Family' tih a ni.

Swasth Nari, Sashakt Parivar chu chhungkaw nu ber aṭanga ṭana hriselna bul ṭanna tura hmalakna a ni a, September 17 aṭanga October 2, 2025 chhung hman a ni ang.