Sorkarin EMS a kalpui mek - Chief Minister

Chief minister Lalduhoma chuan, India ramin Olympic 2036 thlen tuma hma a lak mekah India ram aiawh tur Mizo ṭhalai tam tak neih an duh thu leh, chumi atan chuan sorkarin Empowering Mizoram Sports a kalpui mek thu a sawi.

Tun hnaia 12th North East Championship Shooting Championship, 2025 khârna inkhawm a hmanpuinaah Chief Minister chuan, silai kah (shooting) chu infiamna ngaihsan hlawh tak, taksa leh rilru fîm tak mamawh leh mi bikte telna chi a nih thu a sawi a, "Mizoramin Vision 2036 kan kalpui mek. India chuan kum 2036 Olympic khi thlen tumin hma a la mek a, Olympic 2036-ah hian India ram aiawh thei tur Mizo ṭhalai tam tak neih kan duh a, naupang talent nei ṭhate zawn chhuah a, training ṭha pek tumin Empowering Mizoram Sports (EMS) kan kalpui mek a ni," a ti.

CM Lalduhoma chuan, shooting chu Olympic discipline zinga mi a nih thu sawiin, "Talent nei, chher tlak kan neih phawt chuan EMS hnuaiah chher theih a ni," a ti a; hmarchhak bial huap silai inkahsiak thlengtu Mizoram Rifles Association chungah a lawm thu a sawi.

NE Championship Shooting Championship-ah hian hmarchhak state paruk leh services aṭangin shooter 257 an tel a, Mizoramin gold medal 25 lain pakhatna a ni.

Championship khârna inkhawmah hian organising chairman Lalthansanga, minister leh National Rifles Association of India president Kalukesh Narayan Singh Deo te pawhin thu an sawi.