Ni 100 inhlawhna job card 8,373-in a kiam

Ni 100 inhlawhna tia sawi ṭhin, Mahatma Gandhi National Rural Employment Guarantee Scheme (MGNREGS) hnuaiah kum 2020-21 khan job card nei chhungkua 2,07,970 an awm laiin, kum 2024-25 ah 2,20,890 an awm a, kum 5 chhung hian job card nei 12,920-in an pung a; kum kal mek 2025-26 ah erawh chuan job card nei mi 8,373-in an kiam thung.

Rural Development department tarlan danin, kum 2020-21 chhung khan Mizoramah MGNREGA job card nei chhungkua 2,07,970 an awm a, kum 2021-22 khan chhungkua 2,08,800 awmin, a punna 830 a ni. Kum 2022-23 ah job card nei 2,14,610 (punna 5,810) awmin, 2023-24 ah 2,18,730 (punna 4,120) leh 2024-25 ah 2,20,890 (punna 2,160) an awm. Kum 5 chhunga job card holder punna chu 12,920 a ni.

RD minister Prof. Lalnilawma'n July 29, 2025-a thuthar thehdarhtute a hrilh danin, sorkar kum kal mek (2025-26)-ah job card nei chhungkua 2,12,517 an awm a, hei hi kum 2024-25 chhunga job card nei 2,20,890 aiin 8,373-in a tlem zawk.

Sorkar kum kal mekah hian sorkar laipui chuan wage component atan cheng nuai 35,326 leh material component atan nuai 2,207 a rawn pe tawh a ni.

Sorkar kum 2024-25 khan sorkar laipuiin Mizoram sorkar hnenah MGNREGS wage component atan cheng nuai 65,805.46 leh material component atan nuai 913.61 a rawn pe a; kum 2023-24 ah wage component atan nuai 48,576.28 leh material component atan nuai 3,887.15, kum 2022-23 ah wage component atan nuai 44,985.45 leh material component atan nuai 11,859.46, kum 2022-21 ah wage component atan nuai 46,330.22 leh material component atan nuai 8607.57, kum 2020-21 khan wage component atan nuai 50,827.21 leh material component atan nuai 8,870.28 a pe bawk.

MIZORAMA MGNREGS JOB CARD AWM ZAT

2020-21 - 2,07,970

2021-22 - 2,08,800

2022-23 - 2,14,610

2023-24 - 2,18,730

2024-25 - 2,20,890

2025-26 - 2,12,517