Irrigation & Water Resources dept hmalakna leh hmachhawp sawiho a ni

Chief minister Lalduhoma chuan nimin khan a pisaah Irrigation & Water Resources department hnuaia hmalaknate IWR minister PC Vanlalruata leh department hotute a sawipui.

CM Lalduhoma chuan, Mizoramah kut hnathawka eizawng an tam avangin loneitute'n tui ṭha an mamawh thu a sawi a, "Vawiina kan sawi hmalakna tur leh hmachhawpte pawh hi ram ro tling tur vek a ni a, project ṭha tak tak nei phawt ila, kan bawhzui zel dawn a ni," a ti a; IWR department hian loneitute tana hmalak theihna an ngah thu a sawi.

Ṭhutkhawmah hian IWR department hmalakna leh hmachhawpte sawiho a ni a; Serlui-B HEP tui hman hnu tam tham tak luang ral ṭhin chu a thlang lama thlai chingtute tana hman ṭangkai theih dan tur zir chian ṭha an ti.

NABARD aṭanga hmuh cheng vbc 29.6 sênga thawh tur Tuidai Multipurpose Project, Mamit chu a thawktu tur zawn mai tawh tur a nih thu te, Mat Valley Integrated Water Resource Management & Climate Resilient Irrigation Project, Serchhip DPR peih thawkhat tawh a nih thu leh Brahmaputra Board-in state budget páwn lam aṭangin a thawhna tur an ngaihtuah dawn thute an sawi a ni.

Brahmaputra Board kaltlangin Tlawng lui Springshed Rejuvenation kalpui dan tur dap mek a nih thu sawi a ni a; Mizorama National Hydrology Project leh State Water Informatics Centre kal zel dan tur te, Ngur-Vapar Multipurpose Dam siamna tur hmun chu forest clearance buaipui ṭan tura tih a nih thute sawi a ni bawk.