Zangnadawmna pek theih loh vangin Kolasib-a PWD office kalhsak a ni

Serkhan-Bagha Road kawng laihnaa ram lakah PWD-in zangnadawmna an pek theih loh avangin Kolasib Fast Track Court thupek angin Kolasib Hmar Venga PWD, Kolasib Division Office chu nimin khan kalhsak a ni.

Court Order-a a lan danin, Mizoram PWD chuan kum 2013/2014 vel khan Serkhan-Bagha Road kawngpui zauh hna an thawk a, mimal ram tam tak tihchhiat a ni. Ram neitute'n zangnadawmna an hmuh tur zat sorkar thuneitute'n an bithliah chu chhan hrang hrang vangin pek mai theih a ni lo.

Thubuai hi Kolasib District Court-ah hun eng emaw chen a inchiah hnuah December 2024 khan Kolasib Fast Track Court thupek chhuahin, PWD chu thla hnih chhunga zangnadawmna pe turin a hriattir. Zangnadawmna pek turte chu Saiphai leh North Chaltlang khuaa mi 62 an ni a, pawisa pek tur zawng zawng chu Rs 3,42,25,444.09 a ni.

Court thupek hi PWD-in an tihhlawhtlin mai loh avangin ram neitute chuan Kolasib District Court-ah March 2025 khan execution petition an thehlut. Court chuan zangnadawmna pek hun a bithliah leh a, mahse, PWD-in an la pek theih loh zel avang leh thu mumal an neih theih loh avangin Kolasib Fast Track Court judge R Vanlalena chuan Hmar Venga PWD, Kolasib Division office building chu kalhna tur thupek nimin khan a tichhuak ta a ni.

Court chuan PWD office lirthei leh JCB bakah, khawl lian dang eng emaw zat chu a hrènsak nghal a; a ṭul ang zelin Code of Civil Procedure, 1908-in thuneihna a pek angin office building leh JCB bakah, khawl lian dangte leh office computer-te pawh lilâm theih a ni bawk.

Thu dawn danin, Supreme Court chuan court-a execution petition-te chu thla ruk chhunga chinfel ngei tur a ni tih order tun hnaiah a chhuah a ni.