Thil phût sorkarin tihhlawhtlin loh chuan CSS hnuaia thawkte an nuar zel dawn

September 9, Thawhlehnia nuar ṭan Mizoram sorkara centrally sponsored scheme (CSS) hnuaia thawkte chuan nimin khan mass casual leave lak an chhunzawm a; an thil phûtte sorkarin a tihhlawhtlin loh chuan nawrh zui zel an tum thu an tarlang.

All Mizoram CSS Employees Coordination Committee (AMCECC) chuan an nawrh mek chungchangah nimin khan thuchhuah an siam a; an thil phût chu sorkarin a tihhlawhtlin ngei an beisei thu tarlangin, "A hlawhtlinna kan hmuh hma chuan lungawi lohna hi kalpui zel kan tum a ni," an ti.

AMCECC-in an ruahman lâwk angin CSS hnuaia thawkte hi vawiin Ninganiah pawh a huhoin an châwl leh dawn a; tuna an nawrh mek chhungin sorkar aṭanga thu lawmawm emaw, an lungawina khawp emaw thu an dawn loh chuan an kal zel dan tur an ngaihtuah leh dawn. Tun thlengin sorkar aṭangin inbiakna a la awm lo.

Mass casual leave an lak chu Mizoram hmun hrang hranga CSS hnuaia thawkte'n an zâwm ṭha hle niin AMCECC chuan an tarlang a, "AMCECC Headquarters leh sub-headquarters hruaitute'n an huam chhungah pisa kai an awm leh awm loh ngun takin an vil zui zel," an ti. Lungawi lohna an lantir vanga harsatna thlengah mipui hriatthiamna an ngen bawk.

AMCECC hian Regularization of CSS Employees Scheme, 2024 a taka hman leh, Health department hnuaia provisional employee health worker mi 31-te CSS scheme hmanga dah ngheh sût leh an phût a ni.