Kum 20 chhungin Mizoramah dan anga fa lak 572 an awm

Social Welfare, Women and Child Development (SWWCD) minister Lalrinpuii chuan nimin khan Hotel Regency-ah SWWCD department leh Central Adoption Resource Agency (CARA) buatsaih, fa lâk chungchanga hriat tur pawimawh inzirtirna a hawng. Kum 20 chhungin Mizoramah dan anga fa lak 572 an awm thu tarlan a ni.

Inkhawma tarlan danin, kum 2005 aṭanga kumin August thla thleng khan dan anga fa lâk (adopted children) 572 an awm a; fa lak duha inziak lut, fa lak tur nghak mek nu leh pa 36 an awm mek. Dan ang taka fa lak theih (legally free) naupang 19 leh dan anga lak theih tura buaipui mek naupang 11 an awm mek bawk.

Minister Lalrinpuii chuan, dan anga fa lak chu naupang leh a latu nu leh pate tan nakin zelah a him thu a sawi a, "Adopt ngaia naupang siam ṭhintu lian tak chu nupa inṭhenna leh chhungkaw kehchhia a ni a, hengte hi tihtlem dan tur ngaihtuah a ṭul," a ti a; nupa inṭhenna leh chhungkaw kehchhia vanga naupangte tawrhna rapthlakzia zau zawka inzirtir kawngah ṭan la turin thawktute a chah.

Enkawl leh venhim mamawh naupangte tan enkawl lailâwkna hmun (foster care) a awm thu sawiin Lalrinpuii chuan, "Hei hi naupangte tan Home-a seilian loa chhungkaw enkawlna an dawn theihna hmun a ni a, Mizo mipui hian intihhmuh nachang kan hriat a ṭul," a ti a; nu leh pa eng emaw zatin harsatna nei loin foster care an tih mek thu a sawi.

Orientation and Training Programme on Adoption Regulations, 2022 hi fa lak kaihhnawih buaipuitute puala buatsaih a ni a; SWWCD secretary Lalzarmawii leh WCD joint director Sailopari te pawhin thu an sawi. Mithiamte'n kal khawmte hnenah thil pawimawh an zirtir a, sawihona hun hman a ni.

Tarlan danin, Mizoramah hian fa lak buaipuitu District Magistrate, District Child Protection Unit leh Child Welfare Committee an awm a, district tinah pakhat ṭheuh a awm. Specialised Adoption Agency (SAA) 13 leh Chief Medical Officer 12 an awm a; State Adoption Resource Agency (SARA) pakhat a awm bawk.