Mizoram IAS-te'n Maria CT Zuali a awmna ngaiah dah leh an ngen

Mizoram IAS Association chuan Chief Minister leh minister-te hnenah memorandum an thehlut a, Maria CT Zuali, IAS chu a awmna ngai, Commerce & Industries director-ah dah leh turin an ngen.

IAS pawl chuan, Maria CT Zuali chu Commerce & Industries director-ah kum khat a awm chauh tihin a thawhpuite'n hêk a, sawn chhuah an phût avangin September 1, 2025 khan Fisheries special secretary tura sawn a nih thu an tarlang a, "September 4, 2025-ah Horticulture secretary tura sawn leh a ni. An hêkna a dik em tih lam aiin, a mi chhawrte ngeiin vau titiha sorkar an nawr vanga sawn niin a lang. Thil mak tak a ni," an ti.

Maria CT Zuali an hêkna chu thu dik behchhan a nih leh nih loh finfiahna a awm lo tih tarlangin Mizoram IAS-te chuan, "Hetianga senior officer lak chhuah hi hun lo kal zel atan thil ṭha niin kan hre lo," an ti a; hun lo kal leh zel turah eng department pawhin an hotu berte nêk chhuah tuma hêkin, chu hêkna chu a dik leh dik loh pawh finfiah loin senior officer-te tawrhtir a la awm zel a hlauhawm thu an tarlang.

Sorkarin IAS transfer and posting rules fel takin a neih a rinawm tih sawiin IAS pawl chuan, "Dan palzûta a hnuaia thawktute'n sorkar an nawr hlawhtling thei hi ram danga thil thleng váng tak niin kan hria. Social media-a kan hmuh Maria CT Zuali hian inthunnunna a kenkawh khauh deuh avanga a hnuaia thawkte hi an lungawi loa an hêk hlawhtling a nih phei chuan deparment dangah pawh nghawng ṭha lo tak a nei ngei ang tih a hlauhawm hle," an ti.

Mizoram IAS Association chuan, sorkar thil tum - ṭha tak pisa hun vawn dik, dawrtute biak tura mahni ṭhutna kalsan lo leh bân huna bân tihte kenkawh a har phah a hlauhawm thu tarlangin, "Mipui tana ṭha zawka ngaiin sorkar hian Commerce & Industries director aṭanga Maria CT Zuali a sawnna thupek hi ennawn turin sorkar kan ngen," an ti a; Maria CT Zuali dah let lehna thupek chhuah thuai a nih an beisei thu an tarlang.