Minister-in YMA jubilee lawmna a hmanpui

Minister Lalrinpuii chuan September 4, Ningani khan YMA, Ṭawipui South Branch-in golden jubilee lawmna an buatsaih a hmanpui a, jubilee lungphun a hawng. Khualzahawm Lalramliana Papuia, Lunglei South bialtu MLA-in jubilee souvenir a tlangzarh bawk.

Lalrinpuii chuan, Ṭawipui South Branch YMA-in golden jubilee a thleng chu a lawmpui thu a sawi a; khum 10 awmna Ṭawipui South PHC-ah sorkarin sum tam tak sênga in, hmanrua leh thawktu a dah chu a ṭangkai thei ang bera hman tum turin khawtlang mipui a chah a, "Mirethei leh harsa zawkte sum sên ngai loa damdawi-ina an inenkawl theihna - MUHCS sorkarin a ruahman leh ruang phurh scheme hnuaia chhungte ruang phurhna man tumsak a nite hi mipui thleng phak sorkar hmalakna pawimawh tak a ni," a ti.

YMA chu pawl zahawm leh pawimawh a nih thu sawiin Lalrinpuii chuan, "Golden jubilee-in thlenna hi mi dangte ṭanpui kawngah te, khawtlang hmelma ruihhlo leh HIV/AIDS dona kawngahte chakna thar petu che u ni se ka duh," a ti a; YMA chu ram leh hnam hmachhuan, ram hma hun innghahna a nih angin hun hman ṭhat, zirna, infiamna leh khawtlang ṭhatna tur kawng hrang hrangah theihtawp chhuah turin a chah.

Lalrinpuii chuan, Ṭawipui South hi Kaladan Multi Modal Transit Transport Project kawngpui paltlang khua a nih tuh sawiin, KMMTTP kaltlanga ram dang nena insumdawn tawnna tur chu hmasawnna atan hman tum turin a fujh.

Bialtu MLA Lalramliana Papuia pawhin thu sawiin, Ṭawipui South khawtlang chu hmasawn zel turin duhsakna a hlan.

Health minister Lalrinpuii hian September 4 vek khan Ṭawipui South PHC a tlawh bawk a; a dinhmun a enfiah bakah, thawktute nen PHC tihchangtlunna tura mamawh leh thil pawimawhte an sawiho a ni.