Hmeichhe VC-te thil pawimawh zirtir

Nimin khan Kolasiba SIRDPR hall-ah Kolasib khawpui chhunga VC member hmeichhiate pualin leadership training buatsaih a ni a; Assembly deputy speaker Lalfamkima, bialtu MLA-in a hmanpui.

Training hi All Mizoram Elected Women Representatives president Zomuanpuii'n a kaihruai a; ukil Baby VL Ruatkimi'n dan leh hrai chungchang leh NALSA scheme-te a sawifiah. Kolasib Police Station officer in-charge H Vanlalthanga leh Kolasib SIRDPR principal ZR Ṭhafala ten thil pawimawhte an zirtir bawk.

Lalfamkima chuan, hmeichhe VC-te chu mawhphurhna sang tak nei an nih thu leh an mawhphurhnain khawtlang siamṭhat, sum enkawl leh hmasawnna hrang hranga ke pênpuite a keng tel tih a sawi a, "Hmasawnna atana ralthuam ṭha ber chu hriatna leh thiamna a ni a, sorkar kalphung hriatnaah te, khawtlang sum enkawl thu-ah leh central leh state scheme kan bial atana ṭangkai turte kan hriata kan hman ṭangkai zual zel theih nan inchher hriam a pawimawh," a ti.