Apprenticeship portal chungchang zirho

Labour, Employment, Skill Development & Entrepreneurship (LESDE) minister Lalnghinglova Hmar chuan nimin khan LESDE conference room-ah apprenticeship portal chungchang zirhona a hawng a; Mizote'n central scheme-te chhawr tura inziah luhah ṭan an lak a ṭul thu a sawi.

Lalnghinglova Hmar chuan, central scheme hman ṭangkai a ṭul thu a sawi a, "Mizote'n central scheme awm angte chhawr ve turin inziah luh kawngah ṭan lak kan ngai. Vawiina kal khawmte hi inziak lut tura mi dangte hrilhtu nih tum ṭheuh ila, mahni kawng zawh ṭheuhah theihtawp chhuahin mi dangte tana chhawrnahawm tak nih tum ṭheuh ang u," a ti.

Sorkarin kutkawih eizawnna lama ṭhalaite hmasawnna a ngai pawimawh tih sawiin LESDE Minister chuan, zirhona chu hlâwk taka hmang ṭheuh turin duhsakna a hlan.

Zirhona inkhawm hi LESDE director John Ṭanpuia'n a kaihruai a; deputy director Lalmuanawma'n PM Naps leh Apprenticeship chungchang a sawifiah. Indian Institute of Entrepreneurship, Guwahati aiawhte'n thu an sawi bakah, sawihona hun hman a ni.