School Education dept-in hmanrua sem

School Education department chuan Zirtirtute Ní (Teacher’s Day) pualin nimin khan an directorate tualah HSLC exam centre 105 leh HSSLC exam centre 15 hnenah scientific laboratory equipment an sem. School Education secretary David Lalthantluanga chuan, zirtirtu indaih lohna phuhrûk nan zirtirtu lâk belh tum mek a nih thu a sawi.

HSLC exam centre 105 leh HSSLC exam centre 15 hnenah hian microscope 150, analytical balance 30, meter bridge 75, prism 635, ammeter 635, rheostat 381, burette 635, conical flask 635, beaker 635, measuring cylinder 635, test tube 2540, glass slab 635, concave lens 635, convex lens 635 leh spirit lamp 381 sem a ni.

David Lalthantluanga chuan, sikul tihchangtlunna tur leh zirlaite hmasawnna turin sorkarin theihtawp a chhuah thu sawiin, "Scientific laboratory equipment-te hi zirlaite tana ṭangkai leh an thiamnate tipungtu a nih ngei ka beisei. Zirtirtu indaih lohna phuhrûk nan zirtirtu lâk belh tum mek a ni a, zirlaite'n nakin zela an la ṭangkaipui tur vocational education lamah theihtawp chhuah a ṭul," a ti a; zirna hmanruate chu chhawr ṭangkai ngei turin a chah.

Hmanrua inhlanna inkhawm hi School Education director Angela Zothanpuii'n a kaihruai a, HSLC leh HSSLC exam centre aiawhte'n thu an sawi bawk.