ILP pek chhuah dan zirhona buatsaih

Nimin khan Kolasib DC conference hall-ah Inner Line Permit (ILP) pek chhuah dan zirhona buatsaih a ni a, Bairabi-Sairang rel kawng hawn a nih dawn tâk avangin sorkarin hmun pangaah ILP uluk zawka pek chhuahna siam a ngaih pawimawh thu tarlan a ni.

Sorkar thuchhuah tarlan danin, Bairabi-Sairang inkarah rel a tlan dawn avangin a inkaraa rel chawlhhmun panga - Sairang, Mualkhang, Kawnpui, Hortoki leh Bairabi-ahte ILP uluk zawka pek chhuahna siam sorkarin a ngaih pawimawh thu tarlan a ni a; ILP pek chhuahna turah ILP guidelines te, hmalak ngai leh hriat tur pawimawhte sawihona a ni.

Zirhona kaihruaitu Home department additional secretary Dr Andrew H Vanlaldika chuan, rel kawng vanga Mizoram luhka hawn zauh rualin ram chhung mipui chanvo humhim a pawimawh thu sawiin, "Rail station hawn belh turah pawh Mizoram sorkar leh Home department chuan dan loa state dang aṭang rawn lutte ven kawngah theihtawp chhuah an tum. Mizoram mipui dikna chanvo humhalh hna hi ram chhung mipui tin kutah a awm a, sorkarin dan leh inkaihhruaina a siamte zawm a pawimawh," a ti.

Kolasib DC Robert C Lalhma-ngaiha chuan, Kolasib district chhungah ILP checkgate Vairengte leh Bairabi-ah pakhat ve ve a awm bakah, Saihapui-V leh Phaisena Police duty post-ah ILP enfiah a nih thu a sawi a; ILP pekna leh enfiahna hmunahte chuan fimkhur takin Mizorama lut turte document enfiah ṭhin a nih thu a sawi bawk.