KHAWTHLIR

Thisen pe

LRM Hospital chuan an din champha vawi riatna lawm nan nimin khan an hmunah thisen pek rûnpui an huaihawt a, Civil Hospital, Aizawl tan thisen unit 38 an pe a, petute mipa 28 leh hmeichhia 10 an ni.

END-in heroin man

Serchhipa Excise and Narcotics department mite chuan nimin chhun dar 11 khan Serchhip AOC Vengah Sangrosiami (53) w/o Runliana (L), Seipui, Myanmar leh Zonunpari w/o Lalhumthanga, Leilet, Myanmar hnen aṭangin heroin gram 129.8 an man a; NDPS Act, 1985 tlawhchhanin thubuai an ziak lut.

Dampa fang kual

Dampa biala MLA by-election neih tura MNF party candidate atana puan tâk Dr R Lalthangliana chuan nimin khan Dampa biala khaw hrang hrang a fang nghal. MNF Senior Vice President hian Ailawng, Reiek, West Lungdar, Khawrihnim, Hreichuk, Lungphun leh Kanghmun khuate a tlawh a, Dampa MLA thi ta Lalrintluanga Sailo nupui Biakṭhuami'n a ṭawiawm a ni.

Lehkhabu tlangzarh

Adviser to CM Lalmuanpuia Punte, MLA chuan nimin khan a pisaah Zonun-mawia ziah 'Zaikung Suakpuivungi' tih lehkhabu a tlangzarh. Tlangzarh inkhawm hi Lalvenhima Hmar-in a kaihruai a, C Lalnunchanga’n lehkhabu thlir-lawkna hun a hmang a ni.Mamawii HSS jubilee Mamawii Higher Secon-dary School chuan September 3, Nilaini khan an sikul tualah silver jubilee an lawm a, bialtu MLA Lalchhuanthanga'n hmanpuiin, jubilee monument a hawng. Mamawi HSS hi August 2000 khan din a ni a, arts stream niin, arts subject pakua bakah, vocational subject - IT&ITES leh Apparel zir theihna a ni.

Kawng khâr dawn

Chanmari Traffic Point aṭanga Ramhlun Industry Pêng inkar kawng chu thawm ṭhat a ni dawn a, hei vang hian Traffic SP Ruatsanga Ralte chuan kawngpui hi vawiin aṭanga September 7, Pathianni thleng zing dar 9 aṭanga tlai dar 5 inkarah kawng chanve khâr ṭhin a nih dawn thu a tarlang. Vaivakawn-Hunthar (Company Peng) inkar kawng pawh September 7, Pathianni zing dar 9 leh tlai dar 5 inkarah khâr a nih dawn thu a tarlang bawk.