PM rawn zin tura ruahmanna

Aizawl district magistrate Lalhriatpuia chuan thupek tichhuakin, Prime Minister-in September 13, 2025-ah Lammual aṭanga Bairabi-Sairang rel kawng a hawn tur chu tluang taka tih a nih theih nan leh venhimna ṭha taka kalpui a nih theih nan Aizawl district-ah remote control hmang drone/aerial camera emaw, hetiang lam chi reng reng thlawhtir/hman khap a nih thu a puang. Thupek hian September 15, 2025 thleng a huam ang.

Traffic SP Ruatsanga Ralte pawhin ngenna tichhuakin, PM rawn zin ni-ah mi pawimawhte chêt velnaah harsatna a awm loh nan Ṭhuampui leh Sikulpuikawn inkar kawngpui dungah lirthei, bungrua leh thil dang dah phal a nih loh thu a tarlang. VVIP chet vel chhungin Falkland pêng aṭanga Bawngkawn - Chanmari - Treasury Square - Sikulpuikawn inkarah darkar 2/3 chhung kawngpui khâr a ngai maithei a, lo inring lâwk turin mipui a ngen a ni.