NIRF Ranking 2025 tlangzarh a ni; Univ-ah MZU 82-na, college-ah PUC 49-na

Sorkar laipui Ministry of Education hnuaia National Institutional Ranking Framework-in India rama zirna-in (higher education) ṭha a thlan result nimin khan tihchhuah a ni a; Mizoram University chu India rama university ṭha 82-na a ni a, Pachhunga University College chu college ṭha 49-na a ni.

NIRF Ranking 2025-ah hian university (central & state) ṭha bera thlan chu Indian Institute of Science, Bengaluru a ni a; a ṭha zual 100 zingah hmarchhak state aṭangin MZU bakah, Gauhati University (33-na), Tezpur University (79-na) leh Assam University, Silchar (97)-na te an lang.

Thu dawn danin, NIRF Ranking-ah hian MZU hi kum 2024 khan rank 101-150 inkarah a awm a; kum 2023-ah 76-na a ni a, kum 2022 khan 78-na a lo ni tawh.

College ṭha tehnaah Pachhunga University College chu 49-na a ni a, India hmarchhaka college zingah top 100-a lang pha dang an awm lo. NIRF Ranking 2025-a college ṭha bera thlan chu Hindu College, Delhi a ni. NIRF 2025-ah hian Mizorama college zingah Zirtiri Residential Science College pawh a tel a, rank 201-300 inkarah a awm.

NIRF Ranking 2025 result chu nimin khan Bharat Mandapam, New Delhi-ah Union Education minister Dharmendra Pradhan-a'n a puang a, Education minister of state Jayant Chaudhary pawh a tel. MZU aiawhin registrar Prof. Lalnundanga a tel a, PUC aiawhin principal Prof. H Lalthanzara a tel bawk.

NIRF Ranking-ah hian PUC hi kum 2020-ah a tel ve ṭan a; kum 2022 khan India rama college ṭha 45-na a ni a, kum 2023-ah 34-na leh kum 2024-ah 35-na a lo ni tawh a ni.

NIRF hi Ministry of Education-in India rama zirna-in sangte inelna atan tehfung mumal tak hmanga a buatsaih a ni a, kum 2015-ah bul ṭan a ni. Kumina tehnaah hian India rama college 50,000 chuang zinga 4,030 an tel.