Hmun hrang hrangah Teachers' Day hmang

Vawiin hi Zirtirtute Ní (Teachers' Day) a ni a, sorkar chawlh a nih avangin nimin khan Mizoram hmun hrang hrangah hman niin, zirtirtute leh zirlaite'n intihhlimna hun an hmang.

Siahaah chuan sikul hrang hrangin an remchan dan angin Zirtirtute Ní an hmang a; Dr S Radhakrishnan chanchin chhiar chhuah a nih bakah, faina leh thianghlimna chungchang leh hman khat daih plastic hman ṭhat lohnate an inzirtir. Siaha khawpui hmun lûn laiah zirtirtute zahna leh pawimawhna hrang hrang thuziak leh milem eng emaw zat tar a ni.

Saitual District Teachers' Day Celebration rel angin nimin khan Phullen RD Block chhunga sikul hrang hrangte chuan Phullen community hall-ah Zirtirtute Ní an hmang a; BDO J Lalhmahruaia khuallian niin, Phullen khaw chhunga zirtirtu mi 66 hnenah chawimawina thilpek an hlan.

Champhai district-a zirna-in hrang hrangah Zirtirtute Ní hman a ni a; bawrhsap Mohammad Aaquib chuan GM Higher Secondary School, R Hranga High School, Vengthlang Middle School leh BC Lalthlamuana English Academy-a Teacher's Day hmanna a tlawh kual.

Teachers' Day pual hian Champhai khawpui lûn laiah zirtirtute chawimawina banner leh zirtirtu ṭha chawimawina dawngtute thlalak târ a ni.

Khatla South Primary School-in Teachers' Day an hman chu bialtu corporator Ramthanzauvi'n a hmanpui a, refrigerator a pe. Ramthanzauvi chuan, "Zirna-in ṭha ber chu mahni in kan ti ṭhin a, ka hriat chian em em he sikul zirlaite tan chuan in sikul hi zirna-in ṭha ber a ni. Zirtirtu in nei ṭha a, ka bial chhunga P/S ṭha berah ka ngai che u a ni," a ti.